ஸோபி என்னும் புனைவு

 05:42  காலை வணக்கம்
05:47 காலை வணக்கம்
 05:49  இந்த எழுத்தின் வழி உரையாடுவதில் மகிழ்ச்சி அடைகிறேன்
05:49  நானும் அப்படியே..
 05:50  மலேசியாவில் பிறந்தவரா..? இந்தியாவிலிருந்து போனவரா?
05:53  இரண்டும் இல்லை. மலேசியாவில் இருக்கிறேன். 10 வருடங்களாக இங்கு வாழ்கிறேன். எனக்கு இந்தியாவைப் பிடிக்கும்; அதன் பண்பாடு விருப்பமானது. அதனால் இந்தியப் பெயரில் ஒரு முகநூல் கணக்கு தொடங்கியிருக்கிறேன்

 05:55  உங்கள் முகநூல் முகப்புப் படத்தை வைத்து நீங்கள் இந்தியாவிலிருந்து இடம் பெயர்ந்தவர் என நினைத்தேன்.
05:56  நான் இந்தியா அல்ல; அந்த வாய்ப்பு கிடைக்கவில்லை
 05:56  இவ்வளவு பிடிக்குமா இந்தியாவை?
05:57 ஆமாம். இந்தியாவைப் பற்றி..  அவர்களின் பண்பாட்டைப் பற்றி அறிந்து கொள்ள ஆசையோடு இருக்கிறேன்
 05:58  ஆனால் இந்தியா ஒற்றைப் பண்பாடு கொண்ட நாடல்லவே! பண்பாட்டில் அதற்குப் பல முகங்கள் இருக்கிறது.
05:59 ஆமாம்.. அது  எனக்குத் தெரியும்..
 05:59 பிறகு எந்த அம்சங்கள் உங்களைக் கவர்ந்திழுக்கின்றன.
06:00  மலேசியாவில் நிறைய இந்தியர்கள் இருக்கிறார்கள்; பெரும்பாலும் தமிழர்கள்
 06:01 உங்களைப் பற்றிக் கொஞ்சம் சொல்லுங்களேன்.
06:01 அவர்கள் (இந்தியர்கள்) தங்களின் பாரம்பரியத்தின் மீது பற்றுக் கொண்டவர்களாக இருக்கிறார்கள். இதைப் போன்ற அக்கறையை மற்ற குழுக்களிடம் - சமூகத்தினரிடம் காண முடியவில்லை. என் பெயர் ஸோபியா ;வயது முப்பத்தைந்து
 06:02 ராமசாமி வயது 55. பல்கலைக்கழகத்தில் பேராசிரியர்; இலக்கியம் கற்பிக்கிறேன்

06:04 நல்லது. வாரக் கடைசியிலும் வேலை செய்வீர்களா?
 06:06 இல்லை. இரண்டு நாள் விடுமுறை. என்ன செய்கிறாய்?
06:07 நான் முனைவர் பட்ட ஆய்வு மாணவி; சத்துணவு பற்றிய ஆய்வு
 06:07 எந்தப் பல்கலைக் கழகத்தில்
06:08 மலேசியாவில், புத்ர பல்கலைக்கழகத்தில்
 06:09  என்னைப் போல ஒரு பேராசிரியராக ஆவதற்கு என் வாழ்த்துகள்
06:10 பேராசிரியராக ஆவது ரொம்பக் கடினமானது. நீங்கள் தமிழா
 06:10 ஆமாம் நான் தமிழ் தான்
06:11 இந்தியாவிலிருக்கும் மற்ற குழுக்களை விடத் தமிழர்கள் ரொம்பவும் மரபானவர்கள் - நான் இப்படி நினைப்பதும் சொல்வதும் தவறா?
 06:13  மரபின் மீது பற்றுக் கொண்டவர்களாகக் காட்டிக் கொள்வதில் தமிழர்கள் விருப்பம் கொண்டவர்கள் தான். ஆனால் அவர்களைவிடக் கேரளத்தவர்கள் மரபின் மீது அதிகம் பற்றுக் கொண்டவர்கள் என்பது எனது கருத்து. (கேரளா என்பது மலையாள மொழி பேசும் மாநிலம்) உனது தாய் மொழி இனம் பற்றிச் சொல்லலாமா?
06:14 நான் துருக்கியைப் பூர்வீகமாகக் கொண்டவள்
 06:15 வேலைக்காக மலேசியாவுக்கு வந்தவரா? வேறு காரணங்களுக்காகவா?
06:16  படிப்பதற்காக
 06:17  உனக்கு ஆட்சேபனை இல்லையென்றால் ஸோபி என்று அழைக்கலாமா?
06:17 அப்படி அழைத்தால் மகிழ்வேன்
 06:17 நன்றி ஸோபி எனும் அன்புக்குரிய நங்கையே
06:18 உங்கள் நட்புக்கு நல்வரவு பேராசிரியரே
 06:19 நண்புக்கு இடையில் அந்தச் சொல்லைப் பயன்படுத்தி விலகிக் கொள்கிறாய்
06:19 எந்தச் சொல்?
 06:19 பேராசிரியர்
06:20
எப்படி நான் அழைப்பது ?
 06:21 உன்னை அழைக்க ஸோபி என்ற சொல்லைத் தேர்வு செய்தேன். அதில் ஒரு மென்மை இருக்கிறது. அது போலொன்றை நீ தேர்வு செய்யலாம்.
06:21 ராமி
 06:22 உன் விருப்பம் ; ஆனால் இது பெண்மையைக் குறிக்கும் சொல்
06:22 மன்னிக்க. எனக்கு அது தெரியாது
 06:22 ஸோபிக்கு இந்தியாவைப் பார்க்கும் ஆசை இருக்குமே
06:23 ஆம்; நிச்சயமாகப் பார்க்க வேண்டும். எப்படி உங்களை அழைக்கலாம்?
 06:23 உனது முதல் விருப்பப்படி..
06:23 ரமஸா..? இது பெண்பால் அடையாளம் கொண்டதல்லவே
 06:24 ம்ம்.. இவ்வளவு நீளம் வேண்டுமா..?
 முதல் ஒலியை நீக்கி விடுகிறேன். மஸா என்று.. மஸா இருக்கலாமா?
06:24 ம்ம் ..சரி அப்படியே அழைக்கிறேன்
 06:25 ஸோபியின் விருப்பங்கள். ஆசைகள் பற்றித் தெரிந்து கொள்ளலாமா?
06:26 எனக்கு விருப்பமானவை பயணங்கள். எனக்கான தொழில் ஒன்றை உருவாக்கிக் கொள்ள வேண்டும்.  அதன்பிறகு ஒரு குழந்தையைத் தத்தெடுத்துக் கொள்ள வேண்டும்
 06:28  பயணங்கள் எனக்கும் விருப்பமான ஒன்று தான் ஏன் திருமணத்தை விரும்பவில்லையா?
06:29  ஏற்கெனவே திருமணம் ஆனவள் தான். 9 ஆண்டுகளுக்கு முன்பே விவாகரத்து ஆகி விட்டது
 06:30 இன்னொரு ஆணைக் கணவனாக ஏற்றுக் கொள்ள அச்சமாக இருக்கிறது
06:30  ஆமாம்ம்ம்..
 06:31 விவாகரத்தும் மறு கல்யாணமும் ஐரோப்பிய வாழ்க்கையில் இயல்பானது
06:32 ஒரு ஆணை கணவனாக ஏற்றுக் கொள்வதற்குப் பதில் நண்பனாக ஏற்றுக் கொள்ளலாம். இது தமிழர்களுக்கு இயல்பானதா?
 06:33  ஹ் ஆ... ஆ.. நீ ஏற்கெனவே சொல்லி விட்டாய். தமிழர்கள் ரொம்பவும் மரபானவர்கள் என்று. அவர்கள் அதற்கான முயற்சியே செய்வதில்லை
06:34 அதாவது விவாகரத்து அவர்கள் விரும்பும் ஒன்றல்ல என்கிறீர்கள். ஆனால் கணவனாகவும் மனைவியாகவும் இருப்பதைப் பற்றி விவாதித்துத் தானே ஆக வேண்டும்
 06:35 தமிழர்கள் விவாகரத்தை அதிகம் விரும்புவதில்லை. அதிலும் குறிப்பாகப் பெண்கள்
06:36  தமிழ் ஆண்கள் தங்கள் மனைவிமார்களுக்கு உண்மையாக இருக்கிறார்களா? என்று கேட்டால் நீங்கள் என்ன பதில் சொல்வீர்கள்? திருமணம் செய்து கொண்டு இன்னொரு பெண்ணைத் தோழியாக நினைத்துக் கொள்ளவும் தயாரா இருப்பார்களோ?
 06:37 பொதுவாக மனைவிகளுக்கு உண்மையாக இருப்பதாகக் காட்டிக் கொள்வார்கள். ஆனால் பல பெண்களின் நட்புக்காக ஏங்கவே செய்கிறார்கள்
06:38  உண்மையாகவா சொல்கிறீர்கள் .வாய்ப்புக் கிடைத்தால் தோழிகளை விரும்புவார்கள் என்றா சொல்கிறீர்கள்? வாழ்க்கையில் இடமளிப்பார்கள் என்றா சொல்கிறீர்கள்?
 06:39 ஆமாம். இது பொதுவான ஒன்று தான். அதே நேரத்தில் மறைக்கவும் முயற்சிப்பார்கள்
06:39 ஆனால் பல பேர் பெண் நட்புகள் குறித்து ஆசைப்படுகிறவர்களாகப் பார்க்கிறேன். அதேநேரத்தில் அச்சப்படுகிறவர்களாகவும் பார்க்கிறேன். அச்சம் அவர்கள் பார்க்கும் வேலை காரணமாக ஏற்படுகிறது
 06:40  மரபுக்கும் நவீன மனநிலைக்குமான ஊசலாட்டப் பிரச்னை . நவீன மனிதனாக இருப்பதாகப் பாவனை செய்வதால் ஏற்படும் சிக்கல்..
06:40  நவீன மனிதன் என்றால்
 06:42  ஆமாம். ஒருத்திக்கு ஒருவன் என்பது மரபான கருத்தியல் ; ஆனால் நவீன மனிதன் தன் வாழ்க்கையில் பலருக்கும் பலவிதத்திற்கும் இடமுண்டு எனக் காட்ட விரும்புகிறான்
06:43 தமிழ் ஆண்கள் அதிகமும் தமிழ்ப் பெண்கள் அல்லது இந்தியப் பெண்கள் மேல் ஆர்வமாக இருக்கிறார்களா? அல்லது அயல் தேசத்தினரிடமா? நான் பார்த்தவரையில் தமிழ் ஆண்கள் எளிமையாக ஆடை உடுத்திய பெண்களையே விரும்புகிறார்கள் என்பது என் கருத்து. அதிகம் ஒப்பனை செய்து கொண்ட, அலங்காரமாக ஆடை உடுத்திய பெண்களை நாடுவதில்லை என்று கருதுகிறேன்.
 06:46  தமிழ் ஆண்கள் தமிழ்ப் பெண்களையே திருமணம் செய்ய விரும்புகிறார்கள். ஆனால் வேற்று மொழி அல்லது நாட்டுப் பெண்களைத் தோழிகளாக ஆக்கிக் கொள்ள ஆசைப்படுகிறார்கள்.
ஸோபி உன்னிடம் மன்னிப்பு கேட்க விரும்புகிறேன்
06:47 வேலை இருக்கிறதென்றால் நிறுத்திக் கொள்வோம். பிறகொரு நாள் உரையாடலாம்.
 06:47 எனது மன்னிப்பு அதற்காக அல்ல.
06:48 எனது கேள்விகளைத் தவறாக எடுத்துக் கொள்ள மாட்டீர்களே!
 06:48 விவாகரத்து செய்து கொண்ட ஒருத்தியிடம் திருமணம் பற்றிய பேச்சு  புதிய உணர்வுகளை உண்டாக்கி விடக் கூடும் என்பதால் மன்னிப்புக் கேட்க நினைக்கிறேன்.
06:49  அதற்கான வாய்ப்புகள் இல்லை. என்னைச் சுற்றி நிறைய தமிழர்கள் இருக்கிறார்கள்; அவர்களைப் பற்றித் தெரிந்து கொள்ளவே இதையெல்லாம் கேட்கிறேன்.
 06:49 அப்படியானால் தொடரலாம் ஸோபி
06:50  அவர்களின் பண்பாடு பற்றி அறியும் விருப்பம் தான். இவ்வளவு பேசியது போதும் என நினைக்கிறேன். பேச்சை மாற்றிக் கொள்ளலாம்
 06:50 ஹ்ஹா. ஹ்ஹா..
06:52 பொதுவாக வாரக்கடைசியில் என்ன செய்வீர்கள்?
 06:53 பெரும்பாலும் வாரக்கடைசிகளில் ஊர் சுற்றுவேன்
06:54 எத்தனை பிள்ளைகள் உங்களுக்கு? அவர்களோடு நேரம் செலவழிப்பீர்களா?
 06:54 ஒரு மகள். ஒரு மகன் இரண்டு பேரும் சென்னையில் இருக்கிறார்கள். சென்னை நான் இருக்கும் இடத்திலிருந்து வெகு தூரத்தில் இருக்கிறது. ஆய்வைத் தவிர வேறு எதாவது செய்கிறாயா ஸோபி?
சூரிய வெளிச்சத்தைத் தடுக்கும் கண்கண்ணாடிகளுக்கும் உதட்டுச் சாயக் கட்டி ஒன்றிற்கும் விளம்பர மாடலாக இருக்கிறேன்
06:57 வாழ்க்கை ரொம்பக் கடினமானது.. அதிலும்  தனிமையில் இருக்கும் பெண்களுக்கு..
 06:57 ஆமாம் எனக்குத் தெரியும்.
06:58 மாடலிங் தான் எனக்கு இங்கே கிடைத்த ஒரே வாய்ப்பு
 06:59 மாடலிங் மலேசியாவில் கடினமான ஒன்றா? தனிமை பெண்ணுக்கு மட்டுமல்ல; இருபாலாருக்கும் சுமையும் துயரமும் தான்.
07:00 இங்கே மற்ற வேலைகளை எதிர்பார்ப்பது கடினமானது. அதனால் மாடலிங் எனது தேர்வாகி விட்டது. மலாய்க்காரர்களுக்கு வேலை கிடைப்பது சிரமமானது அல்ல. அவர்கள் மோசமான இனத்துவவாதிகள்
 07:02 ஆமாம் நானும் மலேசியாவைப் பற்றிக் கொஞ்சம் படித்திருக்கிறேன். ஸோபிக்கு துருக்கி தான் சொந்த நாடா? ஐரோப்பாவா?
எனக்கு துருக்கி தான் சொந்த நாடு
 07:05 அப்படியானால் மலேசியாவில் வேலை கிடைப்பது சிரமம் தான்.
07:06 என்னோடு நேரம் செலவழித்து உரையாடியதற்கு நன்றி. நான் நிறைய கேள்விகள் கேட்டு விட்டேன். மன்னிக்க..
 07:07 ஒரு பேராசிரியராக எப்போதும் நிறையக் கேள்விகளை எதிர்பார்ப்பவன் நான். என்னோடு உரையாடியதற்காக ஸோபிக்கு ரொம்பவும் நன்றி
07:07 நேரம் அனுமதிக்கும்போது தொடர்ந்து உரையாடலாம்.
 07:07 நீங்கள் ஒரு கனவான். இந்த வார இறுதி மகிழ்ச்சியாக இருக்கட்டும். நன்றிகள் பல.
 07:08 அப்படியே ஆகட்டும் உனக்கும். விடை பெறுவோம்